Bu gün Aprelin 2-i, ehtimal olunan üçüncü Qədr gecəsidir

Ramazanın 22-dən 23-nə keçən gecə (bu il aprelin 2-dən 3-nə keçən gecə) ehtimal edilən üçüncü Qədr gecəsidir. Quran məhz Qədr gecəsində Peyğəmbərə (s) nazil olub. Onun konkret hansı gecə olduğu bəlli deyil. Amma Peyğəmbər(s) və imamlardan (ə) nəql edilən rəvayətlərə görə, Qədr gecəsi Ramazan ayının 19, 21, 23-cü və ya sonrakı tək gecələrindən biridir. Bu gecələr xalq arasında “Əhya gecələri” kimi də tanınır. Hədislərə əsasən, məhz bu gecənin, yəni Ramazan ayının 22-dən 23-nə keçən gecənin Qədr gecəsi olmağı daha çox ehtimal edilir. Əgər Ramazan 11 ayı sultanı sayılırsa, Qədr gecəsi də Ramazan ayının sultanıdır. Bu gecələri səhərə qədər oyaq qalmaq və ibadətlə məşğul olmaq böyük savab sayılır. Müsəlmanlar bu gecələrdə Qurana, Allahın buyruqlarına dərin ehtiramlarını nümayiş etdirir və 1000 aydan xeyirli bir gecənin fəzilətlərindən yararlanmağa çalışırlar. Bu gecənin müxtəlif əməlləri var. Onlardan bəziləri bunlardır:

1. Qüsl etmək. 2. Səhərə qədər məsciddə oyaq qalıb, ibadətlə məşğul olmaq. 3. İki rükət Qədr gecəsi namazı qılmaq (bu namaz sübh namazı kimidir, amma hər rəkətdə “Həmd” surəsindən sonra 7 dəfə “İxlas” surəsi oxunur və namaz bitdikdən sonra alını səcdəyə qoyub 70 dəfə “əstəğfirullahə və ətubu ileyh” deyilir.) 4. Quranı açıq halda baş üzərinə qoyub Allah, Peyğəmbər (s) və imamların (ə) adlarına Allahı and verib, bağışlanma diləmək. 5. İmam Əli (ə.s) və İmam Huseynin (ə) ziyarətnaməsini oxumaq. 6. 100 rəkət müstəhəb namaz qılmaq. Qəza namazı olanlar yaxşı olar ki, 6 günlük qəza namazı qılsınlar. Bunun savabı həm 100 rəkətli namazın savabını ödəyir, həm də, 6 günlük qəza namazı qılınmış olur. 7. İmam Səccadın (ə) Qədr gecəsində oxuduğu duanı oxumaq. 8. Peyğəmbər və Əhli-beytinə (ə.s) salavat hədiyyə etmək.

Allah-tala tutduğunuz orucu, etdiyiniz ibadət və dualarınızı qəbul etsin!

 

islam.az